Vegamót!
Ahhh, Vegamót. Seinasta föstudag skunduðum við Gæðingarnir upp Laugarveginn og settum stefnu okkar á þennan stað sem ku vera sveittur skemmtistaður um helgar en býr yfir fallegum og elegantískum blæ þegar gengið er inn í hádeginu til málsverðar.

Með hinn gamalkunna gestadómara hinn hæstvirta Joe-Hannes með í för voru Gæðingarnir vongóðir og ætluðust til að kokkurinn á Vegamótum stæði sig betur í eldhúsinu heldur en starfsbróðir hans á Sólon, en eins og almúginn veit fóru Gæðingarnir þangað um daginn og munu aldrei stíga fæti þangað inn aftur. Nei, ekki einusinni til að djamma.

Fyrsta hindrunin var strax við innganginn en þegar Joe-Hannes ætlaði að ganga inn um dyrnar pípti viðvörunartæki og strax komu 2 föngulegir dyraverðir og meinuðu gestadómaranum um inngöngu. Ástæðan þar á bakvið var sú að hann átti að hafa verið á staðnum seinustu helgi ælandi og hrópandi fúkyrðum að öðrum gestum þangað til hann var handtekinn og barinn af lögreglunni fyrir utan. Aðspurður sagðist Joe-Hannes ekkert kannast við þessar lygasögur sem bornar voru að honum og kenndi móður sinni um glóðuraugað. Þar eð Gæðingarnir höfðu farið þessa ferð í leynd og enginn Carlos Lupez Romero til hjálpar, urðu þeir að bæta mælskubrögðum til að blíðka dyraverðina. Þá steig fram frummælandi Gæðinganna, Kristján Cowell, og notaði hann sína margfrægu tungu til að blíðka og róa dyraverðina niður. Án þess að leggja í frekari málalengingar gengu dyraverðirnir sáttir á brott og allir Gæðingarnir ásamt Joe-Hannes gestadómara fengu umsvifalaust að ganga til borðs.

Við inngöngu tekur á móti manni létt reykingarlykt sem stafar væntanlega af útúrtjúttaða djamminu sem á sér stað þarna um helgar og er vel hægt að fyrirgefa það. Gæðingarnir gengu til borðs í notalegu horni og gátu rætt um heimsmálin, fjárhaginn og framtíðaráætlanir Gæðinganna í ró og næði. Pantaðar voru tvær Cajun b.b.q. samlokur, Creola pizza og hamborgarar, en Eyþór eðall beitti fyrir sér nýrri tegund af pöntun, svokallaðri fjarpöntun, sem hann framkvæmdi á markvissan hátt frá klósettinu. Afgreiðslustúlkunni þótti mikið til hans koma og gaf öllum Gæðingunum ásamt Joe-Hannes Werthers Orginal í “le appatíser”. Eins og með flesta staði sem við Gæðingarnir skundum á finnst okkur maturinn vera heldur lengi á leiðinni miðað við að staðurinn er ávallt tæmdur fyrir komu okkar, en þá ætti ekki að vera neitt annað að gera í eldhúsinu. Til að gera langa sögu stutta samdi Bergur Baguette kvörtunarbréf til eiganda Vegamóta og var kokkurinn ásamt öllum starfsmönnum rekin seinna um daginn.

En þá að matnum! Cajun b.b.q. samlokurnar brögðuðust einkar vel og mætti þá segja að Vegamót hafi strax slegið Sólon út af laginu. Cowellinn var ekki nógu ánægður með pizzuna sína en Bergur Baguette og Joe-Hannes nutu sín ágætlega. Segja má að það sem við fengum að borða hafi verið “le pöntun”, ekkert kom óþægilega né þægilega á óvart en það er einmitt það sem við erum að reyna að fá út úr þessum heimsóknum.

Solid frammistaða hjá Vegamótum, en þegar á heildina er litið er hægt að fá betri mat annars staðar í bænum á þessu verði (sem dæmi má nefna að samlokan ein kostaði 1200kr. og lítil appelsín í gleri 300kr.) og því er ekkert verið að sprengja stjörnuskalann í þetta sinn!

Rétt að minnast á að í dag var hinn vikulegi dráttur Gæðinganna haldinn og hvorki meira né minna en Pizza Pronto kom upp á Casíóinn, sem þýðir að næsta föstudag endurmeta Gæðingarnir FYRSTA staðinn sem þeir heimsóttu í sögu félagsins. Búist er við metaðsókn og ef þú, sauðsvarti almúgi, vilt sjá glitta í Gæðinganna er bara að mæta nógu snemma á Ingólfstorg.

PS. Von er á Gæðingunum á Pronto um 11:10 um morguninn og er fólki því ráðlagt að byrja að týja sig á staðinn um 06:30.

PPS. Lögreglan vill benda á að til að minnka umferð og mannmergð verður miðbænum (frá Ingólfstorgi til Hlemms) lokað á milli 09:00-12:00. Já, öllum miðbænum.

PPPS. Siggi stormur mælir með vettlingum og dúnúlpum til að forðast kulda!  ¶ 5:57 f.h.