Hótel Holt. Sögufrægur staður í hjarta Reykjavíkur. Opnað á Bergstaðastræti 37 þann 12. febrúar 1965. Árið 1991 varð það aðili að SRS WORLDHOTELS sem er ein stærsta alþjóðlega hótelbókunarkeðjan í heiminum.

Þessir atburðir fölna í samanburði við það sem átti sér stað á föstudaginn var. Hinn 10. febrúar árið 2006 heiðruðu Matgæðingarnir starfsfólk og gesti hótelsins með nærveru sinni.

Kennslu í Menntaskólanum í Reykjavík var hætt kl. 13:00 sökum þessarar viðburðar og fylktust nemendur jafnt sem kennarar liði með Gæðingana í fararbroddi niður að tjörninni og Ráðhúsinu, þar sem við tók djörf myndataka uns allir voru orðnir það gegnvotir að halda varð upp í Þingholtin.

Allt ætlaði um koll að keyra þegar einkabílstjórinn okkar kom og sótti okkur neðst á Laugarveginum, en fyrr um daginn hafði götunni verið lokað svo við gætum ekið upp eftir henni, en það hefur ekki gerst síðan Eysi eðall tók vitlausa beygju hér um árið. Kirkjuklukkurnar í Hallgrímskirkjuturni klingdu á þessum annars grámollulega föstudegi er Gæðingarnir stigu út úr bílnum, við gríðarleg fagnaðarlæti, um hundrað metra frá Holtinu, en það er liður í að nálgast áhangendur okkar betur að ganga seinasta spölinn að staðnum.

Það voru metnaðarfullir og spenntir Gæðingar sem stigu inn á Listasafnið (nafn veitingahúss Holtsins) og ekki urðu þeir fyrir vonbrigðum. Hvert fræga málverkið á fætur öðru á veggjunum, yndisleg klósettaðstaða og fínpússaðir þjónar. Í raun var ekkert sem benti til annars en að þar myndu frábærir dómar líta dagsins ljós. Bergur Baguette, sem er margrómaður fyrir gríðarlega málverkakunnáttu, fór beint í það að útskýra fyrir öðrum gestum staðarins hin ýmsu málverk sem héngu á veggjunum. Kristján Cowell strumdi beint inn í eldhúsið og gaf kokkunum ráð varðandi lauksultuna en á meðan ræddu Eysi Eðall og Elli Engill heimsmálin, þ.á.m. Jyllands-posten, svaðilför Fossets, valið á íþróttamanni Reykjavíkur og gengi krónunnar svo eitthvað sé nefnt.

Í forrétt smökkuðu Gæðingarnir á rjómalagaðri saffran skelfiskssúpu með hvítlauksflani og hörpuskel, villisveppa tagliatelle, kjúklingalifur og hvítlauksristuðum hörpudisk svo eitthvað sé nefnt. Nautalundir, grænertumauk, villisveppir, lauksulta og kálfasoðkjarni fylltu diska Gæðingana sem dáðust að útliti matsins. Ekki þótti okkur kræsingar þessar vera þunnur þrettándi, þvert á móti var maturinn hreint yndi og ekki eyðilögðu hressu þjónarnir fyrir með skemmtilegu viðhorfi og ítarlegum útskýringum á hverjum rétti fyrir sig. Rúsínan í pylsuendanum, hápunktur tilverunnar, ísingin á kökunni og svona mætti lengi telja, var þegar eftirrétturinn fékk að prýða borð Gæðinganna, en súkkulaðið, ísinn, sósan og ávextirnir voru of mikið fyrir ístrubelginn hann Eyþór Eðal, sem uppgötvaði sjálfan sig slefandi á ísinn sinn. Að sjálfsögðu þykir slíkt athæfi ekki jafnboðið Gæðingi og refsaði Eyþór sjálfum sér fyrir afglöp sín með því að hanga öfugur í 2 sólarhringa fyrir utan Traffic í Keflavík. Síðan þá hefur Eyþór ekkert sést en heimildamaður Gæðingana á Suðurnesjunum þykir hafa áreiðanlegar heimildir fyrir því að stór svertingi hafi borðað hann. Að gefnu tilefni vitna ég í meistara Óðinn:

Gráðugur halur,
nema geðs viti,
etur sér aldurtrega.

Er máltíðinni lauk sátu Gæðingarnir á meltunni um stund en fóru loks að ræða stjörnugjöf. Viti menn, fyrsta fulla hús Gæðinganna leit dagsins ljós! Allir gáfu þeir staðnum 5 stjörnur fyrir framúrskarandi árangur á öllum sviðum matargerðar, andrúmslofts og þjónustu. Þar sem slíkt hafði aldrei hent áður fengum við yfirþjóninn til að hringja í Gæðingakór Hallgrímskirkju sem mætti innan fimm mínútna og tók að kyrja til heiðurs fyrsta fulla húsinu. Þá ákváðum við að veita blaðamönnum inngöngu inn á hótelið og tóku þeir myndir sem brátt munu prýða forsíður dagblaða landsins. Flassflóðið var það gríðarlegt að einn þjóninn blindaðist og tvö málverk eyðilögðust. Eftir kórsönginn var tuttugu hænum fórnað, einni fyrir hverja stjörnu sem staðurinn hlaut.

Sökum mannmergðarinnar fyrir utan fengu Gæðingarnir að fara af Holtinu í gegnum leynigöng sem lágu beint inn á skrifstofu okkar á Bankastræti. Allir voru í sjöunda himni yfir máltíðinni og var fátt um orð næstu klukkutímana þegar meltingin (lu dígeisjón) tók völdin yfir líkömum allra. Yndislegt dígeisjón sem enn lifir í hjörtum Gæðingana og mun án efa gera í langan tíma.

Nú er kominn tími til að slá botninn í þetta, Matgæðingarnir kveðja að sinni með bros á vör og hlakka til að hitta ykkur næstkomandi föstudag. Veriði sæl!

P.S. ekki missa af drættinum næsta miðvikudag, en að þessu sinni verður hann haldinn í Alþingishúsinu og höfum við fengið til liðs við okkur tvemenningana Alex Ferguson og Partí-Hans til aðstoðar. Í þetta skipti verða engir miðar seldir, en þeir sem eiga ársmiða á drættina mega sýna sín snoppufríðu andlit.

P.P.S. fórum á Hlölla seinasta föstudag. Frekar skítt.