Dráttur síðustu viku var fámenn en falleg athöfn. Gæðingarnir vildu fá smá frí frá fjölmiðlafárinu sem hefur verið í kringum þá undanfarið og afvegaleiddu þeir því blaðamenn með því að bjóða þeim á drátt í Egilshöll. Drátturinn sjálfur var í staðinn haldin annars staðar og einungis vinum, ættingjum og öðrum velunnurum Gæðinganna boðið. Casíóinn brást ekki frekar en fyrri daginn og var það staðurinn Purple Onion sem var fyrir valinu.

Purple Onion er landsþekktur fyrir ýmis konar dópbrask en minna þekktur fyrir þann rússneska mat sem staðurinn býður upp á. Með það í huga fannst nokkrum Gæðingum varasamt að fara með Begga baquette þangað en eins og kunnugt er þá er hann forsprakkinn bak við kókín skandalinn sem kom upp á Pizza 67 og hefur síðan verið hálfgerður Pete Doherty Íslands.

Þrátt fyrir það ákváðu Gæðingarnir að skella sér og skunduðu galvaskir á staðinn í föstudags-hádegishléinu eins og venja er. Það fyrsta sem við þeim blasti var kokkur staðarins sem stóð bakvið afgreiðsluborðið en hann var eins sveittur og sóðalegur og þeir gerast. Hann hafði tyrkneskt yfirbragð, var yfirvigtarmaður og í svörtum hlýrabol sem huldi engan vegin geysilega loðnar axlir og hendur. Lyktin á staðnum var hinsvegar allt í lagi þrátt fyrir nærveru þessa ágæta manns og allur aðbúnaður til fyrirmyndar.

Eysi eðall, Krissi Cowell og Beggi Baquette fengu sér allir Shawarma platta en Elli engill fékk sér Sheszlack kjúkling. Varð undirritaður fyrir miklum vonbrigðum þegar í ljós kom að það var engan fjólubláan lauk að finna í Shawarma plattanum. Fyrir ykkur nýgræðingana sem ekki vita hvað Shawarma platti er þá er það kjúklingur í einhvers konar brauðdegi borin fram með gulum baunum, salati og kaldri sósu en Sheszlack er kjúklingur á spjóti borin fram með brauði og salati.

Eftirvæntingin var mikil því Purple Onion er umtalaður staður og hefur ágætis “ lu reputation”. Hann náði þó engan vegin að mæta kröfum Gæðinganna og urðu þeir fyrir talsverðum vonbrigðum en þessir réttir voru algjört miðjumoð. Samt sem áður er þetta þægilegur staður að vera á, verðlagið sanngjarnt en því miður virðast þeir missa marks þegar kemur að matnum.
Gæðingarnir gáfu:

Beggi Baquette: tvær
Elli engill: tvær
Eysi eðall: tvær og hálf
Krissi Cowell: tvær

E.S. Þess má til gamans geta að Quentin Tarantino tók upp heimildarmynd um Gæðinganna meðan hann var staddur hér á landi og verður hún frumsýnd vestan hafs á næstunni.

E.E.S. Fréttir af árshátíð Gæðinganna á leiðinni, stay tuned!